Dapîra Rûveyda (Rûveyde Ersoy) (1906-1995)

Seîd Veroj: Dapîr, şima sewbî ca ra ameyê ewta yan binkî dewa Hop ê?

Dapîra Rûveyda: Bawkalê ma Gêle ra ameyê ewta. Dewijê Hope ameyê bawkalê ma Gêle ra ardî. Vato “dewê derûdore tehda kenê ma, ma zî şorê mîranê Gêle bîyarê û wa vera înan ma bipawê.”

- Wexto ke fermana Armenîyan ameye, ti çend serra bîya?

- Nizdî des serran bînê.

- Ti zana fermana Armenîyan 76 serrî ra ver ameya, eger ti ay wext 10 serra ba, anka bena 86 serra. 

- E, e, hende esta.

- Hope de çend keyeyê Armenîyan bînê?

-Ez vana qay nizdî 7-8 keyan bînê.

-Ay wext Armenî tena Hope de bînê?

- Hope, Heselme, Bînok, Tilbexdadê Bazbende û sewbî cayan de bînê. 

-Dapîr, têkilîya şima û Armenîyan senîn bî, şima şînê û ameynê?

-: Ma sey keydê xo şînê û ameynê, daynê û girotênê.

- Goreyê vatiştê to, ay wext şima gede hesibyenê. Şima qet gedandê Armenîyan reyde kay kerdê?

- E, ma kay kerdê, şînê û ameynê. Ameynê dew ra aw berdê. Dazo Xanime bînê, ray kinê înan dirna. Yên zî şî Harun Begî hete va “Mîre, bewnî kinê ma dirnayo, parçe-parçe kerdo.” Mîre ke ame keye eyştî Xanime rê, eyştî Xanim rê aye tê helisnaye. Ke qey to kinê Armenîyan dirnayo. Ena ser ro Dazo Xanime aşmî Harûn Begî de qalî nêkerd.

- Dapîr ay wext şima û Armenîyan yewbîna vatê “kerwa”. Çi ra vatê kerwa? Şima zaf nizdîyê yewbin bî?

- E, e ma têhete de bî, zaf nizdî yewbin bî, coka vatê kerwa.

-Têkilîya şima senîn bî, vera şima însaneteya înan senîn bî?

- Zaf başî bî, zirarê înan yewî nêresaynê.

-Îne çi kar kerdê, debara xo senî vîyarnaynê?

- Cite kerdê, heywanî nale kerdê, kiras viraştê, ciwalî viraştê yanî çûlagey kerdê.

- Eyro Hope de malê înan zaf esto?

- Eno raşteyê Mehla Armenîyan pêro yê înan bî, hêga û rezê înan zî bînê.

-Wexto ke fermana înan warişte, kê Armenî kiştî?

- Fermane amey, vatê enî gawir î, înan bikişênê. Wexto ke da Armenîyan ro, tira pey Armenîyan vatê “ma mîraz kerd, îne fetîl pewt.” Yanî heta ke îne bidê hikumatî ro, hikumatî verê da piro. 

-Wexto ke hikûmatî eno emir vet, dewijan zî Armenî kiştî?

- Dewijan zî kiştî.

- Dapîr hîç nameyê Armenîyan yeno to vîrî?

-: Belqîza bînê, Êxso bînê,… zafî bînê….

- Dapîr, texmîndê to gore, qetildê Armenîyan de zaf însan ame kiştiş?

-: Zaf kişîyayê, mi vîrî nîno.

- Wexto ke Armenî şîyê, key înan, mal û milkê înan se bî? Çi înan ra pey mend?

-: Mal û milkê înan pêro ca de mend.

- Ena Dapîra Belqîza Armenîya kûra ya?

-: Tilbexdad ra ya, nizdî Bazbend a. Nesroy xo rê arde.

- Nesroy ay senî arde?

-: Wexto ke fermanê înan vejîya, ray kewtî şîyê, o zî şi kaşkerde arde. 

-Sewbî kê keyneyê Armenîyan berdî keye?

-: Şemsî Begî berde, Şûkrî Begî berde…